المستشار البرلماني حسن بلمقدم باغي ينقز من الغرفة الثانية إلى الغرفة الأولى والناس كتقول اش دار في الثانية باش غادي يدير في الأولى

حرية بريس

الحكاية باختصار أن المستشار البرلماني حسن بلمقدم عن حزب الأصالة والمعاصرة بجهة فاس مكناس دار الصابونة لصاحبو في الحزب لي ماعندوش معاه جواد الدواحي البرلماني عن إقليم مولاي يعقوب ورئيس مجلسها الإقليمي ولا هو لي غادي يترشح في الانتخابات البرلمانية المقبلة الأسباب فيها الديبشخي بالزايد وسنأتي إليها بالتفاصيل الدقيقة في المستقبل.

المهم صاحبنا المستشار البرلماني لي منوض روينا باش يولي برلماني في القبة الأولى وداير لعشا القيادة ديال الحزب وجايب مستشارين جماعيين ورؤساء جماعات لتأثيت المشهد السياسي راني انا هو باها في مولاي يعقوب مع أن الأغلبية لي جابهوم وبغا يتصور بيهم كلهم تفرقوا ورجعوا الأحزاب ديالهم والفيلم ديالو طلع على قول عادل إمام فنكوش ولكن قبل من كولشي هادا لي باغي يولي برلماني وهو في الأصل راه برلماني غي بغا ينقز من الغرفة الثانية إلى الغرفة الأولى مع أن الشهرية ديال لفلوس هي هي هنا كنتساءلوا اش دار هو مستشار برلماني الحاجة الوحيدة لي كيدير كان ضارب الطم لا في القضايا الكبيرة ولا صغيرة كان الحاجة الوحيدة لي كايدير فاش كيكولو الحزب ديالو صوت بلا أو نعم عمرنا ما سمعنا عليه دافع عن إقليم مولاي يعقوب هو هداك السلايتي ديال الدواحي .

حسن بلمقدم طلع إلى الغرفة الأولى أو بقا في الغرفة الثانية بحال بحال لأن السيد المستشار البرلماني أو البرلماني المقبل ماغيدير والو الإقليم لان هذه سنوات ما دار والو وماغيدير والو لان الساكنة شبعات هضرة وحتى التواصل مع الناس ماكاينش ولكن مع رؤساء الجماعات والاعيان ويسفط الذبيحة للموسم…. هو الاول كتلقاه

السيد المستشار البرلماني حسن بلمقدم ضرو خاطرو بزاف في زمن كورونا ومع قربات الانتخابات هو يفكر يدير الخير في الناس البسطاء لي ماعندهومش وبدأ كيفرق القفة الرمضانية بالعلالي وصوروني راني كندير الخير ولكن جريدة ورقية ورقات الفيلم والسلطات وقفات القفة لي هي في الأصل ممنوعة وحتى ونتا باغي دير الخير دير تحث الدف بلا بهرجة.

فاش كنشوف التدخلات السيد المستشار الجماعي حسن بلمقدم في دورات المجلس وكتشوف الترعريع ديالو والرغوة خارجة من فمو في مقاطع فيديو عندنا حصريا كنعرف علاش جماعة مولاي يعقوب ماغاديش تمشي لكدام.

♦️♦️♦️يتبع