قريبا حديقة الحيوانات وسوق الماشية بجماعة عين بيضا بنواحي فاس

حرية بريس
فين ماكتسول شي واحد في الأغلبية المسيرة لمجلس جماعة عين بيضا بنواحي فاس كي دازت الدورة كيجوبك دغيا المصادقة على جميع النفط المدرجة بجدول الأعمال في جو يسوده الرغبة في خدمة الصالح العام و الدفاع عن مصالح المواطنين و المواطنات وهادشي راه مزيان مادام مصلحة المواطن هو الاساس في العملية الانتخابية لي طلعوا منها هاد المرشحين .
ولكن راه فاش كنشوفوا هاد الواقع ديال الجماعة وكي داير فيها المواطن كنعرفوا ان الهضرة ما كتشري خضرة كما يقال وكلشي كيقول الفول ديالو طياب وان بين الواقع  الحقيقة  مليون سنة ضوئية.
في الدورة العادية لشهر ماي لمجلس جماعة عين بيضا لي دازت البارح عرفت المصادقة على جميع النقط المدرجة في جدول الاعمال ولي كانت من بينها تهيئة سوق الماشية لي تخصص ليه ميزانية ديال 8 ملايين درهم مابين اقتناء الارض والتهيئة ديالها وخاصة ان الاخبار المتداولة هي ان سوق الماشية لي كاين فاس ماغاديش يبقى وهنا خاصنا نعرفوا شنو هي الطريقة باش غادي ياخدوا بيها الارض ولي خاصها تكون في موقع ممتاز والحقيقة ان هاد المشروع إلا تم بطريقة مهنية غادي يكون لصالح الجماعة من جهة أخرى راه كاين مشروع ديال حديقة الحيوان ولي تم تخصيص 5 مليون درهم لشراء الارض ولكن خاص المجلس يخبرنا واش كاينا شي شراكات مع جهات رسمية اخرى لأن الأمور ديال الحديقة ديال الحيوانات راه ماشي غي الارض راه مسائل أخرى تتجاوز قدرة جماعة ترابية مازال مشكل النظافة ما لقتلوا حل .
ومن النقط المدرجة هو إصلاح الطرق والممرات وهنا كذلك كان على المجلس باش يكون واضح انه كان خاصوا يبين فين غادي يدارو وفين بلاصة  بالضبط باش المنتخبين يعرفوا علاش صوتو وماتبقاش الأمور فيها غي التعميم لأن هناك بعض الدواوير راه خاصهم حالة مستعجلة وخاصة ان الطرقات في الجماعة كتعرف وضعية مهترئة لي تصوبات في عهد الرئيس الإستقلالي السابق زاهر .
التصويت عرف تقريبا الاجماع باستثناء تصويت عبد المجيد ضويو ضد نقطة منح مبلغ مالي الى جمعية الأعمال الاجتماعية لموظفي جماعة عين بيضا فيما المستشار الجماعي بوغريبة صوت على أغلب نقط الدورة بالرفض وبات يغرد خارج السرب علما ان الجريدة اتصلت به لأخد موقفه من نقط الدورة وكعادته الهاتف يرن دون جواب رغم ان المنطقة التي يمثلها تعيش واقعا كارثيا على جميع المستويات.