سياسي بفاس عاطيها غي الغياب في دورات المقاطعة والمجلس والساكنة لي صوتات عليه تسائله فوقاش غادي دافع علينا واش بتصاور كتورنا فيهم اش كليتي وفين كتبحر

حرية بريس

شي بعض المنتخبين لي نجحوا فاس في الانتخابات الجماعية الاخيرة غبروا وبقا شوية يديروهم في برنامج مختفون لأنه في الأصل راه خاصك تعرف انك فاش كتنجح راه الناس صوتات عليك وعلى المجموعة لي معاك باش تكون حداهم ومعاهم وخاصة الا كانت منطقة شعبية بحال مقاطعات المرينيين وسهب الورد… وراه خاصك تكون رهن اشارتهم ماجي جي دير حفلة ديال الختانة والحنة  وكيحسباك طفرتيه لأن هادشي كيتسمى العمل الجمعوي وراه كاين شي الجمعيات لي كيديرو هادشي بلا بهرجة بلا شوفوني اش كندير ولكن لي بغا هاد الطريق من حقو ولكن يدير السياسة ويحل مشاكل المواطنين لي صوتو عليه الا كان في الاصل صوتو عليه ولكن راه الظروف جابتك في الاول في اللائحة وخا ماعندكش غي الشفاوي وبالمناسبة وانت مبتدئ في هذا العمل الجمعوي وعاجبك بزاف دفع الاستقالة ديالك من الجماعة ومن الاخرى لي كتشد فيها 7000 درهم في الشهر لأن الناس باغيا لي يكون معاها ماشي لي غادي كيتصور في المحيط الهندي والبحر الميت مع شحيبر ديالوا وكأن الناس صوتو عليك باش تبين ليهم كروفيت وكالامار والناس لي انت كتمتلهم في الشأن المحلي راه مضروبة فيهم حتى الجذر والظروف ديالهم عالم عليها غي الله وانت فرحان بالصور في امريكا اليونانية ولكن راه اللعبة السياسية لي جيتك حتى الاخير لحظة ماشي على زينك وعلى القروعية ديالك ولكن هي هذي السياسة ماكتأمنش بشي حاجة سميتها الكفاءة ولكن شحال ما عندك ماتساوا….
امول صور ديال الكلامار والكروفيت واليخت راه الشأن المحلي خاص المترشح يكون عندو ضمير ويحضر في الدورات المجلس والمقاطعة ويدافع على الساكنة ديالو ماشي غياب بعذر وفي الاصل راه هادشي كلو راه كيكون التزام بينك وبين الناس لي صوتوا عليك ولي ماصوتوش عليك ” راه صوتو على اللائحة ” ولكن الغياب بعذر ومتابعة اعمالك التجارية راه شي آخر ولكن علاش ماديرش واحد حاجة ودفع الاستقالة ديالك وتهنينا من كتابات بحال هاد المقالات بالدارجة .
والا عرفتو هاذ المنتخب عادي تربحوا معانا نظارات من نوع برق ماتقشع .
وكل عام وانتم بخير
ملاحظة..الا كنتي مبتدئ في هاد النوع ديال العمل الجمعوي ولكن راك معلم في نوع ديال الجمعيات المتخصصة لي كتبدل سميات ديالها مرة مرة.

ولنا عودة


شاهد أيضا
تعليقات الزوار
Loading...